मुंबई : ‘भारतीय जनता पक्षाच्या (भाजप) प्रदेश कार्यकारिणीची बैठक २८ जानेवारी २०१९ रोजी जालना येथे होणार आहे,’ अशी माहिती ‘भाजप’ प्रदेश मुख्य प्रवक्ते माधव भांडारी यांनी २२ जानेवारीला दिली.
ते म्हणाले, ‘प्रदेशाध्यक्ष खासदार रावसाहेब पाटील-दानवे, मुख्यमंत्री देवेंद्र फडणवीस, ‘भाजप’ महाराष्ट्र प्रभारी व राष्ट्रीय सरचिटणीस सरोज पांडे, तसेच राष्ट्रीय सहसंघटनमंत्री व्ही. सतीश यांच्या प्रमुख उपस्थितीत ही बैठक होणार आहे. राज्यातील भाजप मंत्री, प्रदेश पदाधिकारी, जिल्हाध्यक्ष असे सुमारे एक हजार प्रतिनिधी बैठकीस उपस्थित राहतील.’
‘प्रदेशाध्यक्ष दानवे यांच्या भाषणाने बैठकीचे उद्घाटन होईल. समारोप मुख्यमंत्री देवेंद्र फडणवीस करतील. लोकसभा निवडणुकांच्या पार्श्वभूमीवर ही महत्त्वाची बैठक असेल,’ असे त्यांनी सांगितले.